الفنان أمين ناسور يشرح آلية وقانونية الدعم المسرحي

بقلم :الفنان والأستاذ أمين ناسور
من حق المواطنين احتجوا علا دعم وزارة الثقافة و الشباب و الرياضة للفنانين فهاد الأزمة … حيت هكا كيبان ليهم و حتا واحد مخرج و شرح ليهم الأمر على حقيقته و طبيعته.. الوزارة لاحت داكشي بحال شي هم تفاكت منو و الفنانين ناضو كيضربو فبعضاتهم ها لي خدا وساكت هالي مخداش ومحيح ها لي معجبوش لحال و أعداء الفن لقاوها فرصة سانحة باش يضربو فقطاع خلق ليهم بلبلة من شحال هادي…..
باش نتفاهمو
دعم الوزارة لفنون المسرح و التشكيل و الموسيقى و الكتاب هو دفتر تحملات لتقديم خدمة عمومية للمواطنين المغاربة في إطار حقهم الدستوري في الثقافة أي تقريب الثقافة و الفن للمواطنين فابور يعني الفرق و الوكالات و االشركات الفنية كيدفعو ملفاتهم للوزارة و كتبت فيهم لجان مختصة و هي لي كتحدد لي حصل على هاد الدعم باش ينتج و يقدم منتوجو للمواطنين (و بلاما ندخلو فشكون كاياخد و شكون مكياخدش هاداك كلام آخر )و هاد الإطارات طبعا كيكون عندهم ممثل قانوني هو لي كتكتب سميتو….. بمعنى راه ماشي هو لي كايخد داك الدعم و كيديرو فجيبوو و كيكول للوزارة الله يخلف لا راه كيكون معاه فريق و خاصو يقدم عروض ديالو فمدن مغربية مختلفة و يخلص لي معاه و يوكلهم و يشربهم و يسكنهم فالجولة .. مثلا فالمسرح فرقة خدات 14 مليون عدد العاملين فيها غير 10 ديال الناس ما بين4 ممثلين و2 تقنيين و1 اداري و 1مخرج و 1سينوغراف و1 مصممة ملابس متفاهمين و خاصهم يقدمو 5 عروض في مدن مختلفة ….. الممثلين كيتخلصو 1500 للعرض ضربها فربعة ستة آلاف درهم ضربها فخمسة هي 30000 درهم كل ممثل فيهم جاتو 7500 و المهنة ديالو غير المسرح مخدام فسياحة ولا فشركة كيشد 2000 فالشهر ما هو من صحاب الراميد كيشد 800 و لا 1200 فشهر… من شهر 3 و هو كالس مقرقبهاش يعني 7أشهر كيفاش عاش فيها الله أعلم جا حتا لشهر عشرة و غيشد غير النص من هاد 7500 و النص لاخور حتا يدوز مع فرقتو العروض .الا قسمنا هاد المبلغ علا سبعة الأشهر العجاف غتجيه 1071 درهم فالشهر مخداهاش بحال خوتو الغاربة فراس كل شهر لا دار بيها دارت مع الدولة و غتعطيها ليه علا دفعتين تفهمنا… و أجي نكملو باقي الفريق واحد التقنيين الله يكون فعونهم عندهم 1000 فالعرض و هما جوج هي 10000 و بلا ما نقسموها علا 7العجاف حيت حشمت منهم…. زيد عليهم الاداري و المخرج و المصممة و السينوغراف تعويضهم الجزافي جملة 60000 ….متبعين معايا شحال بقا 40000 درهم الخير و البركة…. حلو المسارح و كورونا العدوة بدات تغبر و بدا كيجي الجمهور و غيبداو الجولة.. الفرقة فالرباط و خاصها دير خمسة عروض فخمسة مدن كيفما جا فدفتر التحملات… قلبو علا تواريخ خاوية فالقاعات المسرحية لقاو فمكناس و الدار البيضا و بني ملال و مراكش و تازة…. الديكور خاصو ترنسبور ديالو لي غيهزو يعني صطافيت و لا بيكوب و لا حتا هوندا تراجي ديال هاد المدن الا دار معاك مول ترسبور مزيال غيسوا 15000 درهم.. شوف نتا غا ملي كتهز رحيل من حي ل حي شحلال كيطلب ليك…. ترنسبور ديال الفريق بالمقاتلا و المزاوكة و جيب نتا طوميبلتك و نت طموبيلت خوك…. 6000 درهم.. شحال وصلنا فطوطال 121000 …شحال بقا من ربعطاش لمليون 19000 درهم وخا…. عندك فهاد المدن ثلاثة مدن خاصك تبات فيهم يعني جوج ليلات نهار قبل العرض و نهار العرض حنا نديرو غير اطيل 2 ايطوال 300 درهم الواحد ضربها في ستة ليال غتعطيك 18000درهم و متنساوش راه الشيفور كيبات حتا هو زايد…. يعني شحال بقا 1000 درهم وباقي مهضرنا علا الماكلا و علا الطوارئ خاصك بولة خاصك خشب خاصك شي طرف توب خاصك قنبة تشنق بيها راسك…. أنا أتفق أنه أحيانا ينال الدعم من لا يستحقه و أحيانا يظلم فنانين عندهم ما يكولو و لكن هادا لا يعني أنه تعلقو الفنان و تبقاو تسلخو فيه كتر ما هو مسلوخ بحالو بحال العديد من أبناء هاد الوطن طالعا هابطا و حتا بحال السياسي بحال البناي بحال البوليسي بحال مول الحانوت فيه و فيه… فإلا غنتاقدو باش نقادو ماشي باش نريبو…… سلام عليكم